Image

എത്ര മഹത്തര സംഗീതം (കവിത: മാര്‍ഗരറ്റ് ജോസഫ്)

മാര്‍ഗരറ്റ് ജോസഫ് Published on 07 December, 2020
എത്ര മഹത്തര സംഗീതം (കവിത:  മാര്‍ഗരറ്റ് ജോസഫ്)
എത്ര മഹത്തര സംഗീതം!
പ്രപഞ്ച സങ്കീര്‍ത്തനങ്ങളില്‍;
പ്രതിധ്വനിക്കുന്നാദിമുതല്‍,
പ്രകാശത്തിലുമിരുട്ടിലും;
സ്രഷ്ടാവിന്‍ സ്വരതന്ത്രികളില്‍,
സൃഷ്ടിസ്ഥിതിലയമന്ത്രങ്ങള്‍,
സര്‍വചരാചരമെപ്പോഴും,
സമൂഹഗാനാര്‍ച്ചനയെന്നോ?
ഋതുവാദ്യങ്ങള്‍ പലമട്ടില്‍,
ശ്രുതി, താളങ്ങളുതിര്‍ക്കുമ്പോള്‍,
പെരുമ്പറകൊട്ടിപ്പെട്ടെന്ന് !
കാറ്റായിടിയായ്, മഴയായി;
തപ്പും, കുഴലും, കിന്നരവും,
ഒപ്പമകമ്പടി മേളങ്ങള്‍;
ഒറ്റക്കമ്പി വിപഞ്ചികളില്‍,
ഉത്തമരാഗതരംഗങ്ങള്‍,
രസഭാവങ്ങള്‍ക്കൊത്തവിധം-
വിചിത്രതരമാമീണങ്ങള്‍;
കണ്ണീര്‍പ്പാട്ടുകള്‍ പല്ലവികള്‍,
പൊട്ടിച്ചിരികളിടെയ്ക്കിടെ;
കൊട്ടിക്കയറിയിറങ്ങുന്നു,
നിശ്ചിതവേള നിലയ്ക്കുന്നു,
പ്രകൃതിയരങ്ങത്തെമ്പാടും,
അമ്പേ, വിസ്മയപ്രതിഭാസം.
അനശ്വരനായ ഗായകന്‍,
അദൃശ്യവേദിയില്‍പ്പാടുന്നു,
പഞ്ചഭൂതപ്പെരുമകളെ,
ദിക്കുകളാവര്‍ത്തിക്കുകയോ?
ശബ്ദക്കടലില്‍ തിരതല്ലി-
നിരന്തരം പ്രക്ഷേപിതമാം-
സ്വരങ്ങളേഴ,ല്ലെന്നൂറോ?
എണ്ണമെടുക്കാന്‍ നരനാര്?

എത്ര മഹത്തര സംഗീതം (കവിത:  മാര്‍ഗരറ്റ് ജോസഫ്)
Join WhatsApp News
Sudhir Panikkaveetil 2020-12-07 18:18:37
എത്ര മഹത്തരം ഈ കവിത. ഈ ഭൂമണ്ഡലം ഒരു രാഗസദസ്സാണ്. പ്രകൃതി പാടുന്നു പക്ഷി മൃഗാദികൾ പാടുന്നു. ശ്രുതിലയ താളങ്ങളുടെ ദിനരാത്രങ്ങൾ ഉരുളുന്നു. ഉരുളുകയാണ് അതുകൊണ്ടല്ലേ സംഗീതമാധുരി നിറഞ്ഞു നിൽക്കുന്നത്. ഏഴും എഴുനൂറുമൊക്കെ മനുഷ്യഭാവനകൾ. വയലാറും എഴുനൂറിൽ പൂർണത കണ്ടുവോ? അനുഗ്രഹീതയായ കവയിത്രി പ്രപഞ്ച വീണയിലെ നാദങ്ങളെ സരസ്വതി ദേവിക്ക് അർപ്പിക്കുമ്പോൾ നമുക്ക് നല്ല കവിതകൾ വായിക്കാം. ടീച്ചർക്ക് നന്മകൾ നേരുന്നു.
സന്തോഷ് പാല 2020-12-08 06:27:01
നല്ല കവിത! ടീച്ചറിന് അഭിനന്ദനങ്ങള്‍ !
Joy Parippallil 2020-12-13 22:17:11
എത്ര മഹത്തരം ഈ കവിത....!! വാദ്യ മേളത്തിലെ കയറ്റിറക്കങ്ങൾ പോലെ പദങ്ങളുടെ സ്വര വിന്ന്യാസം ഏറെ മനോഹരം...!! ആശംസകൾ....!!
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക